دلوني لقبره

ياللي دفنتـوا جثتـه.. ليـه تبكـون؟
لولا الحيا..لأقـول : معكـم خذونـي

منه انحرمت وكنت انا عليه محـزون
ما أذكر لمحته .. غير مـره بعيونـي

شفته ..وكانت فرحتـي مالهـا لـون
عجزت لأوصف .. من لمحته شجوني

ياليتني ..كنـت الكفـن يـوم تمشـون
أبقـى معـه بالقبـر ثـم تدفنـونـي


أو ليتني .. من خلفكم كنت (مجنـون)
أتبع خطاكم والعـذر هـو : جنونـي

أبكي وراكم .. وأدعي ان كان تدعـون
ما يكفي انه عـاش عمـره بدونـي؟؟

تكفون < هاكم عمـري اليـوم تكفـون
برخص حياتـي دام خابـت ظنونـي

ما فادني صبري !! ولا فادنـي عـون
ولا فادني دمعي و حرق لي جفونـي



ياليتنـي.. ماعشـت لحظـه بهالكـون
و ياليت ربعي .. في سكات اذبحونـي

وياليتكم .. عن همّـي اليـوم تـدرون
منه انحرمت > ومن عزاه .. احرموني

حتى بوفاته !! يوم أنا طحت مطعـون
أخفيت طعناتـي .. قبـل يفضحونـي

بكيت!! لكـن .. ماتظاهـرت بالهـون
أبكي وأقول : المـوت سبـة طعونـي

و إن كان في حبّي أنا ..ماتحسّون ..؟!
دلوني لقبره .. وهناك .. اتركوني

vbrep_register("6753")