سلها سيف القدر والقرم حول عن حصانه
عظم الله أجر كل الأوفياء المخلصين
من رحل نبض القلوب اللي غمر شعبه حنانه
ما بقى للناس نبض ولا قلوب ولا حنين
عيب ما احزن والوطن يدفن جسد من عز شانه
عيب ما احزن والحزن لمفارق الفرسان دين
كيف ما نحزن لسيف عز دين الله وصانه
كيف ما نحزن لدرع من دروع المسلمين
كاننا ما نحزن لفهد من بنحزن عشانه
العيون لو ما بكت لمفارقك تبكي لمين
إن رحل حاكم يجي مليون حاكم في مكانه
بس فهد اليا رحل يرجع لنا فهد منين
يا منجي عزة الشعب السعودي من هوانه
يا مسجي فطرتك في نهج خير المرسلين
كل دمعه كفنتك وما بكت بعدك جبانه
كل عين ما شكت من غيبتك ما هي بعين
كان لك في كل درب احباب واصحاب وميانه
وكل لك في كل بيت انفاس واحساس وضنين
كنت صبح ما تعلمنا الفلاح الا عشانه
كنت صرح ما تزعزعك الرياح وما تلين
بانتصارك زادت امجاد العرب قدر ومكانه
من ديارك فاض خيرك للمخاليق اجمعين
مع قرارك ادرك التاريخ من يطلق عنانه
عقب نارك ولعت نار القهر بالطيبين
إسألوا دمع اليتامى عن محبته وحنانه
إسألوا التاريخ قبله كان وين وصار وين
إسألوا مجد الوطن عن عهد من وحّد كيانه
إسألوا حزن البشر عن قصة الخير الدفين
إسألوا عن طيبته عن هيبته عن عنفوانه
إسألوا عن فزعته في نصرة المستضعفين
كيف حاكم يسكن الدنيا ويعمل للديانه
يثبت إنّا خير أمه اخرجت للعالمين
وش تكون الحكمه إن ما جات من منطق لسانه
من هم الزهاد كانه ما هو من الزاهدين
وش يكون الاتزان بجنب عقله واتزانه
ويش هو الدين لو هذا الوَرَع ما هوب دين
لا الوطن كأنه وطن ولا جنانه هي جنانه
كل شي بالبلد يا شيخ مكسور وحزين
شعبك اللي عاش فيك وعشت له بأمنه وأمانه
النهار اللي جمع من وجهك الطاهر جبين
الرحيق اللي زرعته في كفوف الزعفرانه
والغرام اللي تركته في ضمايرنا سجين
والسماحه والمروه والحميه والفطانه
والكرامه والكرم واهل الوفا والمحسنين
باب قصرك مسجدك منبره مأذنته أذانه
المصلين الصلاة المؤمنات المؤمنين
كلهم من يوم ذاك القرم حول عن حصانه
والدموع تهلهم في كل وقت وكل حين
لي متى لين الشعوب تعرف فضله وامتنانه
لي متى لين السنين تروح من دون السنين
لي متى حتى نحس ان الفرح مثل الخيانه
لي متى حتى نزين حزن عمره ما يزين
لين ندفع بالمدامع حزن لا يمكن دفانه
لين نغسل بالجروح آلام كل المسلمين
لين نثبت كيف كان بحبنا سيد زمانه
وكيف لما مات فهد مات مرفوع الجبين
كاننا ما نحزن لفهد من بنحزن عشانه
العيون ان ما بكت لمفارقك تبكي لمين
الزعيم ليا رحل نلقى زعيم في مكانه
المصيبة ليا رحل فهد يجي فهد منين
موضوع: القرم حول عن حصانه 
